“WUJOOD AUR ZAAT”

11834033-1170

Wujood ko tou sirf mohabbat karna ata hai. Ishq? Ishq tou zaat karti hai. Isi liye jab rooh Khuda ke paas jaye, tou wujood ko dunya mai chor ke jati hai. Kyunke wujood dunya ka hissa hai, yaheen bheja gaya, yaheen kaam aya aur yaheen mitti mai mil gaya. Hisab tou zaat ka hoga. Aur yoon, jo wujood ki chahaton ka ghulam hua, samjho wo nakaam thehra. Aur jis ne zaat paa li, usne ishq kiya. Aur yehi ishq usay Khuda ki mohabbat ka haqdaar bana deta hai.

Ye theek hai ke Khuda ke ilawa kisi se ishq nahi kiya ja sakta, lekin ye bhi sach hai ke agar insan dunya ki mohabbat Khuda ke ishq ke wajib karda usoolon aur aqaid se chaanne ya guzaarne ke baad kare; tou beshak Khuda us mohabbat ko bhi ishq jesa mazboot bana deta hai, aur ishq jesa sukun bakhsh. Gharz ye ke jab jab tumhe izterab mehsoos ho, tou samjho sirf mohabbat hai. Aur jab jab sukun milay, tou samajh jao ke ishq hai. Aur agar usay kho dene ka dar lagay, tou phir, sirf mohabbat hai. Aur agar andha aitemaad ho, tou ishq.

Par insaan siyah aur safaid par nahi chalta. Insan tou dono ka milaap hai. Insan bhool hai. Insan tauba hai. Bas jab mohabbat ho, tou wujood ki chahat maan ke tauba karo. Aur jab ishq ho, tou uske imtehanon ke liye tayyar raho; sajde ki talwaar aur dua ki dhaal samait, datt jao. Kyunke jo tum kehte phiro ge, Khuda uska imtehan zaroor le ga. Ye tou sadiyon pehle bata diya tha Us ne. (Surah Ankabut, ayah 2-3)

Ishq ka pehla qadam tawakkul hota hai, yaani yaqeen. Aur har mushkil mai sabse ziada isi ka imtehan leta hai Khuda. Isi tarah tou wo munaafiqat ko haq se, aur wujood ko zaat se alag karke dikhata hai.

Kayi baar, tumhare ishq ko wujood lalkaare ga. Kayi baar tum wujood ki maan bhi lo ge. Lekin gir ke sambhalna hi imaan ka suboot hai. Ahista Ahista, tumhare wujood ko zaat zaroor mil jayegi.